Hamaikagarren greba egunean, EAEko Gizarte Ekimeneko ikastetxeetako hitzarmena berritzeko funtsezko gaietan edukiak mahai gaineratzea eskatu diegu sindikatuok Kristau Eskola eta AICEIZEA patronalei. Bide beretik, Eusko Jaurlaritzari eskatu diogu utzi diezaiola greba eskubidea urratzeari eta lagundu dezala gatazka bideratzen. Gaurko grebak ere jarraipen zabala izan du eta milaka izan dira Donostiako kaleak bete dituzten langileak. 12 autobus langile bete gerturatu dira Donostiara beste lurraldeetatik. Danborrada beltz bat irudikatu dugu San Sebastian egunaren bezpera probestuz, negoziaketarako patronalen jarrera beltza deitoratzeko.

Pasa den astean eta aste honetan bertan, greba bezperetan, patronalek bileretara deitu dituzte sindikatuak, baina akordioa lortzeko gakoak diren gaietan ez dute gutxieneko edukirik aurkeztu. Gai eta eduki horiek oinarri oinarrizkoak dira eta orain hiru urte hitzarmena iraungi zenetik ezagunak dituzte.

Patronalek, ordea, ‘etxeko lanak’ egin gabe jarraitzen dute. Adostasunerako gakoak diren gaietan ez dute hobekuntzarik proposatu. Erosahalmena bermatu gabe jarraitzen dute, lan kargak arintzeko neurririk ez dago, enplegua bermatzeko neurri zehatzik ere ez, eta sektore feminizatuentzako hobekuntzarik gabe etorri dira azken mahaira. Lanbide Heziketan zein gainerako gaietan oso eskasak diren edukiak ere ekarri dituzte.

Sindikatuok patronalei eta Jaurlaritzari eskatu diegu gatazka luzatzeko estrategiak eta greba eskubidea urratzeko jarrerak alboratzea, eta hitzarmena berritzea ahalbideratuko duten edukiak landu eta lehenbailehen mahai gaineratzea. Sindikatuok erabateko prestutasuna baitugu gai eta eduki horien inguruan proposamenak egonik behar bezain beste biltzeko eta adostasunak lortzeko.

Honako hauek dira sindikatuen eskaera nagusiak: lanpostuei eusteko neurri eraginkorrak; lan kargak arintzeko eta sektore feminizatuenen lan baldintzak hobetzeko neurriak; finantzazio publikoari lotu gabeko eta erosahalmena bermatzeko soldatak; eta Lanbide Heziketarako baldintza egokiak. Zentzu berean, beharrezkoak dira Berdintasun planak, euskalduntze planak eta lan
Osasuna bermatzeko planak, bereziki arrisku psikosozialenak.

Sindikatuok beste hiru greba egun ditugu deituta urtarrilerako: hilaren 23, 24 eta 25.